0

Құрметті ата-ана!

Кезекті оқу жылы, мемлекеттік емтихандар аяқталды. Әлпештеген перзенттеріңіз енді сіздердің көз алдарыңызда болады. Бала – әрқайсымыздың өміріміздегі ең қымбат байлығымыз. Сіз бен біз үшін ең бастысы - балалардың амандығы мен қауіпсіздігі.

Білім беру ұйымдарындағы тәрбие жұмыстары барысында балаларымыздың өмір қауіпсіздігі үшін түрлі шаралар әр түрлі форматта ұйымдастырылуда. Құқық қорғау органдарының өкілдерімен кездесу, өз құқықтарын білу, жол ережесін сақтау, беймезгіл уақытта жүрмеу, қауіпті аймақтарға бармау, құқықбұзушылық пен зорлық-зомбылық жасамау т.б. жөнінде түсінік жұмыстары жүргізіліп, үлкендердің өсиеттері айтылды.

Өкініштісі, кей жағдайларда бала тәрбиесіне бір жақты қарап, осындай шаралардың маңыздылығына мән бермейтін ата-аналар да кездесіп жатады. Соның салдарынан бала өмірінде келеңсіз, қайғылы оқиғалар орын алса, жорта сөйлеп, жоғымызды жасырамыз, жалған айтып, барымызды асырамыз. Екі ортада баланың зардап шегетіні естен шығады.

Әр нәрсенің өз орны, өз уақыты болады. Баланың ойын-сауық орындарында, компьютерлік клубтарда заңды өкілдерінсіз түнгі уақытта жүрулері, мейрамханалар мен жалдамалы үйлерде кештер өткізулеріне жағдай жасау, көлік жалдау, ерте жастан көлік жүргізіп үйрету, көлік тізгінін ұстату, рұқсат етілмеген аумақта теңізге түсу, белсенді демалыс пен ыстық мезгілде қараусыз қалдыру секілді әрекеттерге ерік бермеулеріңізді сұраймын.

Соңғы кездері жазатайым оқиғалар мен қылмыстардың салдарынан қаза тапқан және зардап шеккен балалар туралы жаңалықтар көбеюде. Олардың әрқайсысы – үлкен қасірет.

Құқық бұзушылықтар анықталған жағдайда дереу 102 нөміріне, ал төтенше жағдайлар туындаса 112 нөміріне хабарласу қажет.

Ұлтымыздың мақтанышы батыр атамыз Бауыржан Момышұлы «Тәрбиелі – тәртіптің құлы, тәртіпті – елдің ұлы» дегеніндей, тәрбиенің тегеурінін босаңсытпай, басты назарда ұстайық. Тәртіп пен тәрбиенің ұштасуы қауіпсіз қоғамды қалыптастырады.

Адам ұрпағымен ұлы, еңбегімен ерен, келешегімен кемел болса, мұның мөлдір бастауы, алтын тамыры – тәлім – тәрбие ісінде жатыр. Егеменді еліміздің болашағы – балалар. Ұрпақ амандығы – ұлт келешегі. Сондықтан бала өмірінің қауіпсіздігіне немқұрайлы қарамайық.

Маңғыстау облысының білім басқармасының басшысы